آپ بس خود کو پہچانو !

آپ بس خود کو پہچانو !

تحریر ؛ انس اسلام

عصرِ حاضر ؛
یعنی 18 ویں صدی کے بعد سے عقیدۂ آزادی (فریڈم) کی بنیاد پر تعمیر و تشکیل و ترتیب و قائم و نافذ و مسلط کی گئ جدید قومی ریاستوں میں مذہب و مذہبی جماعتوں اور علماء کی صرف چار حیثیتیں ہیں

1 ؛
ریاستی آلۂ کار
2 ؛
مذاہب و ادیان کو سیکولرائز کرنے والے
3 ؛
پریشر گروپ
4 ؛
مذہب کو نیشنلائز کرنے والے (یعنی قومی سلامتی کے بلا معاوضہ مستقل وکیل)

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
اِن چار حیثیتوں کے علاوہ جدید ریاستوں میں مذہب و مذہبی جماعتوں ، تنظیموں اور علمائے مذاہب کی کوئ اتھارٹی اور اوقات نہیں ۔۔۔۔۔۔ اور نہ ہی ممکن ہے !

جو مذہب ، جو علماء ، جو مذہبی جماعت  (شعوری یا غیر شعوری طور پر)  یہ چار فرائض ادا کرے گی ۔۔۔۔۔۔۔ وہ منظورِ نظر اور قابلِ قبول ، با عزت ، باعثِ تکریم ۔۔۔۔۔۔۔!
اس کے علاوہ علماء و مذاہب و مذہبی جماعتوں کا کوئ بھی کردار انتہا پسندی و قدامت پسندی ، بنیاد پرستی ، انقلاب و بغاوت سمجھا جاتا ہے !

علماء و پادری و پوپ ۔۔۔۔۔ سب کے سب اہلِ مذہب ، Freedom , equality , progress کی بنیادوں پر قائم،  جدید قومی ریاستی مفادات کے عین مطابق پوزیشن میں ورک کریں ۔ تو ریاست خوش و راضی رہتی ہے !
جونہی کہیں وہ عالمی طاقتوں ، یا وطنی طاقتوں کی غلامی سے نکل کر بات کرنے لگیں (یعنی خالص مذہب کی روشنی میں)  تو ریاست فوری سے پہلے اُن کی جانی دشمن بن جاتی ہے !

یہ اپنی شادیوں ، فوتگیوں پہ علماء کو بلائیں گے ، ساتھ ساتھ رکھیں گے ، لیکن صرف اس لئے کہ قوم ریاست کو ایک مذہبی ریاست ہی خیال کرے ۔۔۔۔!!

یوں کہہ لیں تو بالکل غلط نہ ہوگا ۔۔۔۔ کہ عصرِ حاضر میں مذاہب و مذہبی جماعتوں کی حیثیت محض ٹشو پیپر کی سی ہے ۔۔!!

عالمِ اسلام ہو یا خالص کفریہ ریاستیں ، مذہب صرف غصّے اور ناراضی کے دو تین امور تک محدود ہوگیا ہے ،!
پوری دنیا میں اصلاحی ، مذہبی ، احیائ ، تبلیغی جماعتیں و تحریکیں مطالبوں کی سیاست ، احتجاج و جلسے جلوس ، یک نکاتی ایجنڈوں ، سنگل ایشو مومنٹ اور رسوم و رواج تک محدود ہوگئ ہیں !

جدید ریاستیں علماء و مذاہب کو فقط اپنے مفادات و مقاصد و اہداف کیلئے استعمال کرتی ہیں ، اس کے بعد لمحے سے پہلے بھول جاتی ہیں ، اور ایسے بھولتی ہیں جیسے مذاہب و علماء دنیا میں کوئ وجود ہی نہیں رکھتے ۔۔!!

اس کی وجہ یہ ہے کہ ؛
Freedom , equality , progress
اِن تین عقائد کے ساتھ مذہبی تعقُّل و علمیت چل ہی نہیں سکتی !!
صرف اسلام ہی نہیں ، بلکہ کوئ بھی مذہب ۔۔۔۔
ہر مذہب حلال و حرام ، صحیح و غلط ، خیر و شر ، حق و باطل کے آسمانی و اِلٰہی پیمانوں کی وجہ سے آزادی ، مساوات اور ترقی کا خاتمہ کر دیتا ہے  ، !

دراصل مذہبی جماعتیں جدید ریاستوں کی حقیقت و اصلیت سے واقف ہی نہیں ،۔۔۔!
ہر مملکت و ریاست نے مذاہب کو قومیت و وطنیت کے تابع کر رکھا ہے ، ۔۔۔۔
جب کہ مذاہب تو ۔۔ (خصوصاً دینِ اسلام) انسان کو قومی و علاقائ و نسلی و رنگ و زبان و مادّے و سرمائے و ذات پات و شخصیات و پارٹیوں ۔۔۔۔ ایسے تمام معیارات و تعصُّبات و فِرَق سے آزاد کرکے آفاقی دل و دماغ عطا کرتا ہے !

لبرٹی و فریڈم کی بنیاد پر کھڑے ہوئے عصرِ حاضر نے مذہب سے اسکی آفاقی شناخت چھین لی ہے ،
عالمِ اسلام میں بھی مذہبی قوم پرستی ، مذہب کی قوم پرستانہ تشریحات اور مقصدِ حیات  ''ترقی''   مذہب کا خاتمہ کر رہی ہے ،!
مذہب اگر ہے ۔۔۔۔ تو وہ فرد کا ذاتی مسئلہ بن چکا ہے ،
انسان کی اجتماعی زندگی سے مذہب کو کِک آؤٹ کردیا گیا ہے !

جدید ریاستوں کی ادارتی صف بندی میں علماء کی شمولیت کو بالکل ضروری نہیں سمجھا جاتا ،
انسان کے امور و معاملات اب انسان کے خالق کی بجائے چند عالمی طاقتیں طے کر رہی ہیں ،
جسے انسان آزادی سمجھ رہا ہے ، وہ بدترین غلامی سے بھی آگے کی کوئ انتہائ گھٹیا شے ہے !

جدید انسان کی صرف چار حیثتیں ہیں ،
Consumer , Spectator , Worker Voter

عصرِ حاضر کا انسان صرف اِن چار حیثیتوں میں تقسیم اور بِکھرا ہوا ہے ،
ہر فرد خواہشات کے لامتناہی سلسلے میں بندھا ہوا ایک حیوان کی شکل اختیار کر چکا ہے ،
ترقی یافتہ ریاستوں کا ، سرمائے کا پجاری جدید انسان ، خاندانی نظام کو درہم برہم کر چکا ہے !
ہر اجتماعیت ٹوٹ رہی ہے ، جس کے نتیجے میں سول سوسائٹیز وجود میں آچکی ہیں !!

مذہب کا بھگوڑا ، اللہ ، رسول کا باغی ؛ سول سوسائٹی کا انسان اکیلا بھاگ رہا ہے ،
چوبیس گھنٹے کما کر بھی خواہشات پوری نہیں کر پا رہا ،

کیا مرد ، کیا عورت ۔۔!
سبھی کمانے نکلے رہتے ہیں ، گھر ویران ہوتے جا رہے ہیں ، مہمان نوازی ختم ہوتی جارہی ہے ،
دن رات مارکیٹ و بازار پُر رونق رہتے ہیں ، ہر کوئ ہر وقت کچھ نہ کچھ خرید رہا ہے ،!!

ڈپریشن کا مارا ، نفسیاتی مریض ، حقیقی سکون و راحتوں سے محروم انسان نما ماڈرن ڈھانچہ  ،۔۔۔۔ فحاشیوں و بدماشیوں و گناہوں و برائیوں سے خود کو بہلاتا اور انٹرٹین کرنے کی ناکام کوششیں کر رہا ہے !

عقیدۂ آزادی اور عقیدۂ ترقی نے اس کی آخرت تو جو تباہ کی ، سو کی ۔۔۔۔۔ یہ اپنی دنیا کو مسائل و دکھوں و بیماریوں و سیاپوں کی آماجگاہ بنا چکا ہے ، !!

آخر کار قبر میں پہنچ جاتا ہے ،
اس کی جمع پونجیاں اسکی بے دین اولاد اڑانے پہ لگ جاتی ہے !!

انا للہ وانا الیہ راجعون !

حضرات !
ہمارے خیال سے ابھی وقت موجود ہے ،
ہر انسان اپنی حیثیت پہچان لے ، ۔۔۔۔ ، اور علماء جدید معاشروں و ریاستوں کی بنیادوں سے خوب واقفیت پا لیں ۔۔

اِسی میں سب خیر اور تمام بھلائیاں ہیں ،

انسانیت کا حقیقی خیر خواہ و ہمدرد ؛ صرف اور صرف اللہ رب العالمین اور آپ کا حبیب رسول اکرم (صلی اللہ علیہ وسلم) ہیں

آپ بس خود کو پہچانو !
آپ اللہ کے بندے اور محمد (صلی اللہ علیہ وسلم) کے مطیع و مُتَّبع امّتی ہو

#انس_اسلام