مرد کی داڑھی ہی اصل فطرت ہے جبھی تو کشش ہے

نیو یارک: نئی تحقیق میں یہ بات سامنے آئی ہے کہ خواتین طویل المدت رشتوں کے لیے پوری داڑھی والی مردوں کو ترجیح دیتی ہیں۔ بھارتی اخبار، ٹائمز آف انڈیا کے مطابق، خواتین طویل المدت رشتوں کی تلاش میں داڑھی والے مردوں کی جانب جھکائو رکھتی ہیں، کیونکہ داڑھی نہ صرف مردوں کی وجاہت اور ہیبت کی علامت ہوتی ہے، بلکہ اس سے ان کی زرخیزی میں بھی اضافہ ہوتا ہے۔ اس تحقیق میں مزید بتایا گیا ہے کہ ’’ نتائج سے پتہ چلتا ہے کہ کشش کے اعتبار سے داڑھی اور مردانہ وجاہت میں ایک خاص تعلق پایا جاتا ہے۔‘‘ تحقیق کے دوران آسٹریلیا میں واقع ’’ یونیورسٹی آف کوئنز لینڈ‘‘ سے تعلق رکھنے والے برنابی ڈکسن اور ان کے ساتھیوں نے کمپیوٹر کی اسکرین پر مردوں کے چہروں میں مختلف تبدیلیاں کیں۔ ان میں بغیر داڑھی والے چہرے، ہلکی خشخشی داڑھی، گھنی خشخشی داڑھی اور پوری داڑھی والے چہرے شامل تھے۔ جب ان چہروں کو خواتین کو دکھایا گیا، تو خشخشی داڑھے والے چہرے کو مختصر المدت تعلقات کے لیے سب سے زیادہ ریٹنگ ملی، جبکہ پوری داڑھی والے چہروں کو طویل المدت تعلقات کے لیے سب سے زیادہ پرکشش قرار دیا گیا۔ ’’ جرنل آف ایوولوشنری بائیولوجی‘‘ میں شائع ہونے والی اس تحقیق کے مطابق، انتہائی مردانہ اور انتہائی زنانہ خصوصیات کے حامل چہرے سب سے کم پرکشش قرار پائے ۔